ബിഎല്‍എം സാമ്പത്തിക തട്ടിപ്പ് കേസ്: 103 കോടിയുടെ സ്വത്തുക്കള്‍ മരവിപ്പിച്ച് ഇഡി
സാമ്പത്തിക തട്ടിപ്പ് കേസില്‍ ബിഎംഎമ്മിന്റെ 103 കോടി രൂപയുടെ സ്വത്തുക്കള്‍ താത്ക്കാലികമായി മരവിപ്പിച്ച് എന്‍ഫോഴ്‌സ്‌മെന്റ് ഡയറക്ടറേറ്റ്. 320 അക്കൗണ്ടുകള്‍ കേന്ദ്രീകരിച്ചാണ് ഇ ഡി പരിശോധന നടത്തിയത്. സാമ്…
സാമ്പത്തിക തട്ടിപ്പ് കേസില്‍ ബിഎംഎമ്മിന്റെ 103 കോടി രൂപയുടെ സ്വത്തുക്കള്‍ താത്ക്കാലികമായി മരവിപ്പിച്ച് എന്‍ഫോഴ്‌സ്‌മെന്റ് ഡയറക്ടറേറ്റ്. 320 അക്കൗണ്ടുകള്‍ കേന്ദ്രീകരിച്ചാണ് ഇ ഡി പരിശോധന നടത്തിയത്. സാമ്പത്തിക തട്ടിപ്പ് കേസില്‍ മുമ്പ് ബിഎല്‍എം സ്ഥാപകന്‍ ആര്‍ പ്രേംകുമാറിനെ അറസ്റ്റ് ചെയ്തിരുന്നു. എന്നാല്‍ പിന്നീട് നടപടി ക്രമങ്ങളിലെ വീഴ്ച ചൂണ്ടിക്കാട്ടി അദ്ദേഹത്തിന് ജാമ്യം അനുവദിച്ചിരുന്നു. പിന്നീട് കേരളത്തില്‍ ഉള്‍പ്പെടെ വിവിധ ബിഎല്‍എം ഓഫീസുകളില്‍ ഇ ഡി പരിശോധന ശക്തമാക്കിയിരുന്നു.
ബിഎല്‍എം സാമ്പത്തിക തട്ടിപ്പുമായി ബന്ധപ്പെട്ട് ഇന്നലെയാണ് 12 ഇടങ്ങളില്‍ ഇ ഡി പരിശോധന നടത്തിയത്. എറണാകുളം, കോഴിക്കോട്, തൃശൂര്‍, തിരുവനന്തപുരം, മൂന്നാര്‍, ചെന്നൈ എന്നിവിടങ്ങളിലെ വിവിധ കേന്ദ്രങ്ങളില്‍ പരിശോധന നടന്നതായി ഇ ഡി വാര്‍ത്താക്കുറിപ്പിലൂടെ അറിയിച്ചു. വിവരങ്ങള്‍ ക്രോഡീകരിച്ച ശേഷം ആര്‍ പ്രേംകുമാറിനെ ഇ ഡി ചോദ്യം ചെയ്യാനായി വിളിപ്പിച്ചേക്കുമെന്നാണ് വിവരം. നിലവില്‍ ക്രൈം ബ്രാഞ്ച് കേസിന്റെ പശ്ചാത്തലത്തിലാണ് എഫ്‌ഐആര്‍ രജിസ്റ്റര്‍ ചെയ്ത് അന്വേഷണം നടത്തുന്നതെന്നും ഇ ഡി വ്യക്തമാക്കി.
ബിഎല്‍എം കോ ഓപ്പറേറ്റിവ് സൊസെറ്റി വഴി പിരിച്ച പണം സ്വകാര്യ ആവശ്യത്തിന് ഉപയോഗിച്ചെന്ന കേസിലാണ് കഴിഞ്ഞ ദിവസം ബിഎല്‍എം സ്ഥാപകനെ അറസ്റ്റ് ചെയ്തത്. കോഴിക്കോട് നിന്നുള്ള ക്രൈംബ്രാഞ്ച് സാമ്പത്തിക കുറ്റാന്വേഷണ വിഭാഗം ചെന്നൈയിലെത്തിയാണ് പ്രേംകുമാറിനെ കസ്റ്റഡിയില്‍ എടുത്തത്. സൊസൈറ്റി വഴി സാധാരണക്കാരില്‍ നിന്ന് ശേഖരിച്ച നിക്ഷേപത്തുക നിയമവിരുദ്ധമായി സ്വന്തം പേരിലും ഭാര്യയുടെ പേരിലും രൂപീകരിച്ച വ്യാജ കമ്പനികളിലേക്ക് വകമാറ്റിയെന്ന് ക്രൈംബ്രാഞ്ച് കണ്ടെത്തിയിരുന്നു.
