ചേരാനല്ലൂർ വാഹനാപകടം: 17-കാരന്റെ ജാമ്യം റദ്ദാക്കാൻ നീക്കം; ജഡ്ജിയെ ചോദ്യം ചെയ്തു, കേസ് ക്രൈംബ്രാഞ്ചിന്

ചേരാനല്ലൂർ വാഹനാപകട കേസിൽ അപകടമുണ്ടാക്കിയ പതിനേഴുകാരന്റെ ജാമ്യം റദ്ദാക്കാൻ പോലീസിന്റെ നീക്കം. ഇതിനായി പോലീസ് എറണാകുളം സെഷൻസ് കോടതിയിൽ അപേക്ഷ നൽകി. കേസിന്റെ അന്വേഷണം കൂടുതൽ ശക്തമാക്കുന്നതിന്റെ ഭാഗമായി ജില്ലാ ക്രൈംബ്രാഞ്ച് ഏറ്റെടുത്തിട്ടുണ്ട്.

അപകടമുണ്ടാക്കിയ വാഹനത്തിന്റെ ആർ.സി ഉടമയായ പതിനേഴുകാരന്റെ പിതാവ് (ജഡ്ജി) കേസിൽ പ്രതി ചേർക്കപ്പെട്ടിട്ടുണ്ട്. പോലീസ് ആലുവ കമ്പനിപ്പടിയിലുള്ള ഫ്ലാറ്റിലെത്തി ചോദ്യം ചെയ്തു. എന്നാൽ, തന്റെ അറിവോടെയല്ല മകൻ വാഹനമെടുത്ത് ഓടിച്ചതെന്നാണ് ജഡ്ജി പോലീസിന് നൽകിയ മൊഴി. ആർ.സി ഉടമയായ ജഡ്ജിയെ പ്രതിചേർത്ത വിഷയം പോലീസ് ഹൈക്കോടതിയെ അറിയിക്കും.

മോട്ടോർ വാഹനവകുപ്പിന്റെ നീക്കപ്രകാരം അപകടമുണ്ടാക്കിയ പതിനേഴുകാരന് മോട്ടോർ വെഹിക്കിൾ ആക്ട് അനുസരിച്ച് 25 വയസ്സ് വരെ ലൈസൻസ് എടുക്കുന്നതിന് വിലക്കേർപ്പെടുത്തും. കൂടാതെ, അപകടത്തിൽപ്പെട്ട ബെൻസ് കാറിന്റെ ആർ.സി സസ്പെൻഡ് ചെയ്യാനും തീരുമാനമായിട്ടുണ്ട്.

കേസിലെ തുടർനടപടികൾ സംബന്ധിച്ച് ഇന്ന് നിർണ്ണായക തീരുമാനമുണ്ടാകും. ഇതിനായി എഡിജിപി പി. വിജയൻ ഇന്ന് കൊച്ചിയിലെത്തും. സംഭവത്തിന്റെ ആദ്യഘട്ടത്തിൽ എഫ്.ഐ.ആർ നൽകുന്നതിൽ വീഴ്ച വരുത്തിയ പോലീസുകാർക്കെതിരെ നടപടിയുണ്ടാകുമെന്നാണ് വിവരം.

അതേസമയം, വീഴ്ച വരുത്തിയ പോലീസുകാർക്കെതിരെ വൈകീട്ട് 4 മണിക്ക് മുൻപായി നടപടിയുണ്ടായില്ലെങ്കിൽ വീണ്ടും സമരം ആരംഭിക്കാനാണ് അപകടത്തിൽ മരിച്ച ജയബാലകൃഷ്ണന്റെ കുടുംബത്തിന്റെ തീരുമാനം.